3. അപാരത

അപാരത എന്ന വാക്ക് എനിക്ക് ഏറെ ഇഷ്ടപ്പെട്ടതാണ്. അറ്റമില്ലാത്തത് അന്തമില്ലാത്തത് കണ്ണെത്താദൂരം പരന്നുകിടക്കുന്നത് ഭാവനയ്ക്കും അതീതം എന്നിങ്ങനെ അനന്തവിസ്താര സൂചകമാണ് എനിക്ക് ഈ പദം.

ഈ വാക്ക് ഉൾപ്പെട്ട ഗാനങ്ങളിൽ പ്രധാനമായും മൂന്നെണ്ണമാണ് എൻ്റെ സ്മരണയിൽ നിൽക്കുന്നത്.

ആദ്യത്തെ അപാരത തീരമാണ് - ഭാർഗ്ഗവീ നിലയം എന്ന സിനിമയിലെ ഏകാന്തതയുടെ അപാര തീരം. കണ്ണെത്താ ദൂരം വ്യാപിച്ചു കിടക്കുന്ന വിജനതീരത്തിൽ ഏകാന്തനായി നിൽക്കുന്ന ബഷീറിന്റെ ചിത്രം ഇതിലും നന്നായി പകർത്താൻ വാക്കുകൾക്കാവില്ല.

സരസനും സർവ്വജന സമ്പ്രീതനുമായ ബഷീറിന്റെ ഉള്ളിൽ കനത്ത ഏകാന്തതയാണ് എന്നാണ് എനിക്ക് തോന്നിയിട്ടുള്ളത്. റസാഖ് കോട്ടക്കൽ, പുനലൂർ ബാലൻ എന്നിവരാണ് ബഷീറിന്റെ ഏറ്റവും മികച്ച ചിത്രങ്ങൾ എടുത്തിട്ടുള്ളത്. അതിൽ എടുത്തു പറയേണ്ടത് റസാഖിന്റെ ചിത്രീകരണ രീതിയാണ്. പോസ് ചെയ്തു എടുക്കുന്നതല്ല റസാഖിന്റെ രീതി. വ്യക്തിയുടെ കൂടെ കഴിഞ്ഞ് സ്വാഭാവികമായ ഭാവപ്പകർച്ചകൾ പകർത്തുന്ന ശൈലിയായിരുന്നു അയാളുടേത്. അത് കൊണ്ടാവാം റസാഖിന്റെ ചിത്രങ്ങളിൽ ബഷീറിന്റെ കണ്ണുകളിൽ പ്രതിഫലിക്കുന്ന ഏകാന്തത മറ്റധികം ചിത്രങ്ങളിൽ കണ്ടിട്ടില്ല. ഈ ഏകാന്തത ഉൾക്കൊണ്ട ഗാനമാണ് പി ഭാസ്കരൻ സിനിമക്ക് വേണ്ടി രചിച്ചിരിക്കുന്നത്.

അടുത്ത അപാരത കടലാണ്. ദത്തുപുത്രൻ എന്ന ചിത്രത്തിന്ന് വേണ്ടി വയലാർ എഴുതിയ "ആഴി, അലയാഴി... അപരാതേ നിൻ വിജനമാം കരയിൽ, അലയുന്നു ഞാനാം പഥികൻ" എന്ന ഗാനത്തിൽ.

മൂന്നാമത്തെതിൽ അപാരത ആകാശമാണ്. അപാര സുന്ദരമായ നീലാകാശം. അപാര നീലാകാശത്തെ അനന്തതയുടെ മഹാസമുദ്രമായ് കാണുന്നു. സൂര്യനും ചന്ദ്രനും ഭൂമിയടക്കമുള്ള ഗ്രഹങ്ങളും ഹംസങ്ങളായി ഒഴുകി നടക്കുന്ന ഒരു സമുദ്രം. അനാദി കാലം മുതൽ അജ്ഞാത കാമുകിക്ക് വേണ്ടി സിംഹാസനം ഒരുക്കി വിഫലമായി കാത്തിരുന്നു ഒടുവിൽ കണ്ണീർ വാർക്കുന്ന ഒരു ഏകാന്ത കാമുകനായി ഈ അപാരതയെ സങ്കൽപ്പിക്കുന്നു. കൽപ്പനാ സുന്ദരമായ ഈ ഗാനത്തിന്റെ വരികളാവട്ടെ ഇന്ന്.

അപാര സുന്ദര നീലാകാശം

അനന്തതേ നിൻ മഹാസമുദ്രം

 

ഊഴിയും സൂര്യനും വാർമതിയും ഇതിൽ

ഉയർന്ന്‌ നീന്തും ഹംസങ്ങൾ

ആയിരമായിരം താരാഗണങ്ങൾ

അലകളിൽ ഉലയും വെൺനുരകൾ

 

അനാദി കാലം മുതലേ ഈ

അജ്ഞാത കാമുകൻ അകലെ

ഏകാന്തതയുടെ മൗന ഗാനമായ്

ഏതോ കാമുകിയെ കാത്തിരിപ്പു

 

പൗർണമിതോറും സ്വപ്നത്തിൽ അവൾക്കായി

സ്വർണ്ണ സിംഹാസനം ഒരുക്കുന്നു

കാണാതൊടുവിൽ വർഷമുകിലിനാൽ

കദനക്കണ്ണീർ ഒഴുക്കുന്നു

pic courtesy

 

ചിത്രം: വിത്തുകൾ (1971)

രചന: പി ഭാസ്കരൻ

സംഗീതം: പുകഴേന്തി

ആലാപനം: യേശുദാസ്

സിനിമ സംവിധാനം ചെയ്തതും പി ഭാസ്കരൻ തന്നെയാണ്.

 

ഗാനത്തിന്റെ ലിങ്ക്:

 

 https://www.youtube.com/watch?v=OX2rTbc7YHE



 


Comments

Post a Comment

Popular posts from this blog

10. കളിയാടും ദൈവങ്ങൾ

Image
pic: wiki പുരാതന സംസ്കാരത്തിൽ ദൈവങ്ങൾക്ക് മനുഷ്യരുടെ സകല സ്വഭാവങ്ങളും ഉണ്ടായിരുന്നു. കളികളും അടിപിടി കശപിശയും എലാം അവർക്കും വിധിച്ചതായിരുന്നു. ഇന്ത്യൻ സംസ്കാരത്തിലെ ദൈവങ്ങൾ എന്ന പോലെ ഗ്രീക്ക് റോമാ സംസ്കാരങ്ങളിലും ഇത് കാണാം.  "വികൃതി ബാലന്മാർക്ക് തുമ്പികൾ എന്ന പോലെയാണ് ദൈവങ്ങൾക്ക് നാം, വിനോദത്തിനായി അവർ നമ്മെ കൊല്ലുന്നു" എന്ന് ഷേക്‌സ്‌പിയർ പറയുമ്പോൾ തുമ്പികളെക്കൊണ്ട് കല്ലെടുപ്പിക്കുന്ന കളി ദൈവങ്ങൾക്കും ഉണ്ട് എന്ന് തോന്നിപോകുന്നു.   നമ്മുടെ ദൈവങ്ങൾക്കും ധാരാളം കളികൾ കൽപ്പിച്ച് നൽകുന്നുണ്ട്. സാക്ഷാൽ പരമേശ്വരന്റെ വിനോദ കളികൾ തിരുവിളയാടൽ എന്ന പേരിൽ പ്രസിദ്ധം. ഭക്തരെ കളിപ്പിക്കാത്ത അവതാരങ്ങൾ കുറവാണ്.  ശിവപ്രീതിക്കായി പാർവ്വതി ആടുന്ന നൃത്തം തിരുവാതിര രാവുകൾക്ക് മാറ്റ് കൂട്ടുന്നുണ്ട്. അങ്ങിനെയുള്ളൊരു ഗാനമാണ് തീർത്ഥയാത്ര (1972) എന്ന സിനിമയ്ക്ക് വേണ്ടി പി ഭാസ്കരൻ രചിച്ച് എ ടി ഉമ്മർ സംഗീതം നൽകിയ ഈ ഗാനം.  കണ്ണടച്ച് ഈ പാട്ട് കേട്ട് നോക്കു. പാൽ പോലെ പരന്ന, തെളിഞ്ഞ നിലാവൊളിയിൽ ദേവഗണങ്ങൾ കണ്ടു നിൽക്കെ പന്തടിച്ചാടുന്ന ദേവിയുടെ നടനം തെളിയുന്നില്ലേ..  ചന്ദ്രകലാധരന്ന് കൺ കുളിർ...
Read more

12. അർത്ഥമില്ലായ്മയുടെ അമരഗീതങ്ങൾ

Image
  image: courtesy രണ്ട് മഹായുദ്ധങ്ങൾ ലോകത്തെ അനിശ്ചിതത്വത്തിലാക്കിയ ഇരുപതാം നൂറ്റാണ്ടിൻറെ ആദ്യപാദത്തിൽ, പ്രബലമായ സർഗ്ഗസൃഷ്ടികളിൽ, പ്രത്യേകിച്ച് സാഹിത്യത്തിൽ, പ്രതിഫലിച്ച നിരർത്ഥകത അസ്തിത്വ ദുഃഖം എന്ന പേരിലറിയപ്പെട്ടു. നമ്മുടെ നാറാണത്ത് ഭ്രാന്തൻ സ്വന്തം ജീവിതത്തിലൂടെ പാഠം പകർന്ന നിരർത്ഥകതയ്ക്ക് ഗ്രീക്ക് പുരാണത്തിലെ സമാന കഥാപാത്രമായ സിസിഫസിനെ കൂട്ട്പിടിച്ച് ആൽബർട്ട് കാമു രചിച്ച "ദ മിത്ത് ഓഫ് സിസിഫസ്" എന്ന വ്യാഖ്യാനകൃതി ലോക വിചാരധാരയെ കാര്യമായി സ്വാധീനിച്ചു. തണുത്തുറഞ്ഞ വിസ്‌മൃതിയിലാണ്ടുകിടന്ന ജീവിതത്തിൽ വസന്തത്തിന്റെ തുടിപ്പുമായി വരുന്ന ഏപ്രിൽ ക്രൂര മാസമാവുന്നത് അത് വീണ്ടും പുതിയ ജീവിതങ്ങൾ കിളിർക്കാൻ കാരണമാവുന്നത് കൊണ്ടാണ്. അർത്ഥമില്ലാത്ത ജീവിതത്തിലെ വിരസ ജീവിതങ്ങൾ ആയാസത്തിൻ്റെ അനുവർത്തനങ്ങളാണ് (ടി എസ് എലിയറ്റിന്റെ തരിശുഭൂമി.)  ഇതിന്റെ പ്രതിഫലനങ്ങൾ മലയാളത്തിലും ഉണ്ടായി. മുകുന്ദൻ ഓ വി വിജയൻ തുടങ്ങിയവരുടെ ആദ്യകാല രചനകളിലും ആധുനിക കവികളിലും എഴുപതുകളുടെയും എണ്പതുകളുടേയും സിനിമകളിലും ഈ വിചാരധാരയുടെ സ്വാധീനം കാണാം.  ജീവിതാസക്തി നഷ്ടപെട്ട് ശൂന്യതയുടെ ഉപാസകരായി മാറിയ ക്യാംപസുകളിലെ ...
Read more

9. സ്വപ്‌നങ്ങൾ

Image
  image source: Wiki https://upload.wikimedia.org/wikipedia/commons/6/6d/Vatalar_Ramavarma.jpg സ്വപ്നങ്ങൾ കാണുവാനുള്ള കഴിവ് മനുഷ്യർക്ക് മാത്രമായിരിക്കും, അല്ലെ? മനുഷ്യ മനസ്സുകളുടെ സന്തത സഹചാരിയായ സ്വപ്നം കവികളെയും ഏറെ സ്വാധീനിച്ചിട്ടുണ്ട്. പറയാനും ഓർമ്മിക്കാനും ആളുകൾ കൂടുതൽ ഇഷ്ടപ്പെടുന്നത് സുഖകരമായ സ്വപ്നങ്ങളാണ്. അല്ലാത്തത് "ദുഃസ്വപ്‌നം" എന്ന ഫോൾഡറിലേക്ക് മാറ്റി പിന്നീട് മായ്ച്ച് കളയുന്നു.  സ്വപ്‌നങ്ങൾ പൊതുവെ പ്രണയത്തിൻറെ കൂട്ടുകാരായാണ് അറിയപ്പെടാറുള്ളത്. കനവുകളെ ആയിരം കനവുകളെ കാതൽ ദേവനിൻ തോഴർകളെ എന്ന് നാ കാമരാശൻ (തമിഴ് ചിത്രം: നീതിക്ക് തലൈ വണങ്ക് ) ഇവിടെ സ്വപ്നങ്ങളോട് തൻ്റെ അടുക്കലേക്ക് കാമുകിയെ പറഞ്ഞു വിടാനാണ് ആവശ്യപ്പെടുന്നത്.  സ്വപ്നത്തിൽ നിന്ന് ഉണർത്തിയ കാമുകിയോട് താൻ കണ്ട സ്വപ്നത്തേക്കാൾ തിളക്കമുണ്ട് അവൾക്ക് അത് കൊണ്ട് അവളോട് ഉണർത്തിയതിന്ന് നന്ദി ഉണ്ട് എന്ന് പറയുന്നു ആംഗലേയ കവി ജോൺ ഡൺ (ദ ഡ്രീം).  ജീവിതം തന്നെ ഒരു സ്വപ്നമാണോ എന്ന് തമിഴ് കവി ഭാരതി (നിറ്റ്പതുവേ നടപ്പതുവെ..). ഏകദേശം ഇതേ ആശയം തന്നെ അമേരിക്കൻ കവി എഡ്ഗാർ അലൻ പോയുടെ കവിതയിലും  - ജീവിതം എന്നത് സ്വപ...
Read more